Karabaj Bulgariako kaleetara eraman dugu
Hogei neurri handiko argazki dira, Plovdiv-eko erdigunean, hain justu. Zalantzarik gabe, formato ederra dugu Gilad Sade argazkilariak Nagorno Karabajen egindako lana erakusteko. Arax Foundation elkarteak lagunduta, Sadek Hadrut armeniar bailara ekarri du plazara. Eskualdea azerbaijandarren eskuetara igaro zen iragan udazkenean; galerak sekulako mina eragin zuen armeniarren artean, makina bat baitira Hadruten, atzean, gelditu diren elizak (batzuk III mendekoak dira) eta bestelako altxor arkeologikoak. Ronakek urte askoz jarri du fokoa Nagorno Karabajen. Hemen aurki dezakezue azken gerra baino askoz haratago zabaltzen den kobertura.